“Üç həftədir məktəbimizi tarakan basıb. Xüsusən 3 və 4-cü mərtəbələrdə həşəratlar çox yayılıb. Uşaqlarımız sinifdə otura bilmirlər, tavandan üzərilərinə tarakan tökülür”, - 153 nömrəli məktəbin şagirdlərinin valideynləri burada yaranan antisanitar vəziyyətdən narazılıqla danışıblar. Bu haqda bu gün, 15 dekabr tarixində Qafqazinfo məlumat verib.
“Bir neçə gündür müəllimlər də belə şəraitdə dərs keçməkdən imtina edirlər. Onlar etiraz olaraq aşağı düşürlər, direktor onları geri - dərsə qaytarır. Direktor Təranə Paşayevaya dəfələrlə şikayət etmişik. Hər gedəndə bizi otaqdan qovur. Deyir ki, “yekə adamsınız, ilan deyil ki, həşəratdır da... Çıxın kabinetdən, sizi eşitmək istəmirəm”. Antisanitariya baş alıb gedir. Valideynlərdən yığdığımız fond pulu ilə dezinfeksiya vasitələri almışıq. Dövlət orqanlarına müraciət etmişik, heç bir xeyri yoxdur. Uşaqlar bilmirlər dərsə qulaq assınlar, yoxsa tarakanlardan qorunsunlar”, - onlar əlavə ediblər.
Məsələ ilə bağlı Bakı Şəhəri üzrə Təhsil İdarəsindən (BŞTİ) bildirilib ki, təhsil müəssisələrində mütəmadi olaraq əks-epidemik profilaktik dezinfeksiya işləri aparılır. 153 nömrəli məktəbə gəlincə isə, binada növbədənkənar dezinfeksiya işlər görüləcək.
