Xətai rayonunda Vətən müharibəsi şəhidi Rəcəb Məmmədov anılıb. Bu haqda 22 iyul tarixində Xətai Rayonu İcra Hakimiyyəti xəbər verib.
Xətai rayonu 221 saylı orta məktəbin şagirdləri Şəhidlərin Xatirə Parkında döyüşlərdə şəhid olmuş Rəcəb Məmmədovun xatirə lövhəsinin qarşısında anım tədbiri keçiriblər. Tədbirdə İcra Hakimiyyətinin rəsmiləri, şəhidin ailə üzvləri, yaxınları, döyüş yoldaşları və ictimaiyyət nümayəndələri iştirak ediblər.
Vətən müharibəsində şəhidin qəhrəmanlığından, vətənpərvərliyindən danışılıb. Şagirdlər tərəfindən vətənpərvərlik mövzusunda şeirlər və musiqilər səsləndirilib. Sonda isə xatirə şəkli çəkilib.
Rəcəb Məmmədov Vətən müharibəsi başlayan ilk gündən könüllü olaraq döyüş bölgəsinə getmişdir. Füzuli rayonunun Yuxarı Seyidəhmədli kəndi istiqamətində düşmən üzərinə hücuma keçərkən oktyabrın 6-da şəhidlik zirvəsinə ucalmışdır. Ölümündən sonra "Vətən uğrunda", "Füzulinin azad olunmasına görə" medalları ilə təltif edilib.
[URIS id=53683]
