Məktəb bufetlərində qiymətlərin marketlərdən yüksək olması, sağlam qidalanma üçün nəzərdə tutulan məhsulların satılmaması valideynləri narahat edən məsələlərdən biridir. Üzə çıxan şagirdlərin zəhərlənməsi halları valideynlərin narahatlığını artırır. Bu haqda bu gün, 11 noyabr tarixində Bakuplus.az Baku TV-yə istinadən məlumat verir.
Ekspertlər neqativ faktların baş verməsinin səbəbi məktəb bufetlərinin fəaliyyətinə mərkəzləşdirilmiş nəzarətin olmamasını hesab edirlər.
“Məktəb bufetləri ayrı-ayrı şəxslərə icarəyə verilir, uşaqların qidalanması biznesə çevrilib. Məktəblərdə isti yeməklər hazırlanmır. Məktəb foyelərində meyvə avtomat aparatları quraşdırılmalıdır. Uşaqlar yaxşı qidalanmırlar, bu da onların sağlamlığına ziyan verir”, – deyə Azad İstehlakçılar Birliyinin sədri Eyyub Hüseynov öz fikrini bildirib.
“Regional idarələr artıq məktəblərdən şagird başına əlavə 35 qəpik pul alırlar. Bu da qiymətlərin yüksəlməsinə gətirib çıxarır. Dünya təcrübəsində şagirdlərə məktəb bufetlərində ödənişsiz olaraq süd və isti yeməklər verilir. Hesab edirəm ki, Azərbaycanda da ən azından şagirdlərə gündə bir dəfə ödənişsiz olaraq süd və isti yemək verilə bilər”, – təhsil eksperti Kamran Əsədov bildirib.
Məktəb bufetlərinə nəzarət tədbirləri Nazirlər Kabinetinin 171 nömrəli Qərarına əsasən aparılır. Qida Təhlükəsizliyi Agentliyi illik plan və vətəndaşlardan daxil olan müraciətlər əsasında yoxlamalar aparır.
Bakı Şəhər Təhsil İdarəsindən isə bildirilib ki, təhsili idarəetmə qurumları iaşə xidmətlərinə nəzarət edən dövlət qurumları ilə birgə əməkdaşlıq edir. Monitorinqlərin nəticələri təhlil olunur və zəruri tədbirlər görülür.
