“Sevgi evi” qadın və uşaq sığınacağının sahibi Könül Qasımova və bu sığınacaqda saxlanılan “Totu” ləqəbli qızın anası hüquq müdafiəçisi Kəmalə Ağazadənin ittihamlarına cavab veriblər. Bu haqda bu gün, 21 dekabr tarixində Bakuplus.az məlumat verir.
Bir müddət əvvəl Kəmalə Ağazadə qızın qaşıqla qidalanarkən heç bir reaksiya göstərmədən qorxmuş gözləri ilə donmuş pozada dayandığı video görüntülərini paylaşmışdı. Ağazadə uşağı belə vəziyyətə salmaqda Könül Qasımovanı ittiham edib və aidiyyəti strukturları tədbir görməyə çağırıb.
Bundan sonra sığınacaq sahibi İnstagram-da canlı yayım keçirib və bu zaman o, hüquq müdafiəçisini böhtana görə məhkəməyə verəcəyini bildirib.
Uşağın durumu ilə bağlı Qasımova qeyd edib ki, TƏBİB uzun müddətdir ki, onların “Sevgi evi” sığınacağına dəstək olub: “Bu uşaq Səhiyyə Nazirliyinin tabeliyində olan xəstəxananın reanimasiya şöbəsində olub, yəni orada rəsmi qeydiyyata alınıb. Uşaq da Uşaq Nevroloji Xəstəxanasında qeydiyyatdadır və onun səhhətində problemlər olduğuna dair bütün sübutlarımız var. Bütün bu sənədlər rəsmi qaydada məhkəməyə təqdim olunacaq”.
Həmçinin canlı yayımda qızın anası ilk dəfə danışıb. “Hamı soruşur ki, bu uşağın anası haradadır? Buradayam. Kəmaləyə üzümü tutub xatırlamaq istərdim ki, əvvəllər xəstə uşaqla yanına gələndə məni qapıdan içəri buraxmırdı. “Mənim sığınacağıma layiq deyilsən”, - deyib məni qovdun. Nə köməkdən danışırsınız? İndi Xoşqədəmlə qızımı əlimdən almaq istəyirsən, amma görməyəcəksən. Mənim şərəfsiz həyat sürdüyümü deyirsən, amma sübutun yoxdur. Mən də sizin barənizdə polisə şikayət etmişəm”, - deyə o bildirib.
O əlavə edib ki, bu uşaq nevroloji xəstəxanada gecə-gündüz yuxusuz qalmışdı: “Könül xanım mənə hər zaman dəstək olub, buna görə də ona çox təşəkkür edirəm. Onu da qeyd edim ki, qızımı heç kim döyməyib. Göydə Allah, yerdə Kənül xanım arxamda dayanır”, - o deyib.
Daha öncə məlum olub ki, azyaşlıların işgəncələrə məruz qaldığı iddia olunan “Sevgi evi” qadın və uşaq sığınacağı müvəqqəti olaraq bağlanıb.
