Bakıda bir neçə fərqli ünvandakı binaların adları və nömrələri eynidir. Bu haqda bu gün, 25 yanvar tarixində Bakuplus.az Xəzər Xəbər-ə İstinadən məlumat verir.
Xətai rayonu, Zığ yolu ərazisində fərqli ünvanlarda yerləşən binaların eyni adda olması sakinlər üçün ciddi problemlər yaradır.
“Taksi sifariş verirəm, aparır tamamilə başqa yerə. Kommunal ödəniş etmək istəyirəm, məndən köhnə ünvanı istəyir. Mənim evimdə 12 nəfər qeydiyyatdan keçib. Biz özümüz 5 nəfərik. Başqa yerdə yaşayan şəxslər mənim evimə qeydiyyata düşüblər. Bu da ünvanların eyni olduğuna görədir”, – deyə sakinlər şikayət edirlər.
Əmlak məsələləri Dövlət Xidmətindən məsələ ilə bağlı bildirilib ki, vətəndaşın çıxarışı olmadığı üçün ünvanların təyini zamanı uyğunsuzluğa yol verilib. Binalara yeni ünvan veriləndən sonra problem aradan qaldırılacaq.
Ekspertlər isə qeyd ediblər ki, vətəndaşın keçmiş ünvanının çıxarışı olmasa belə, qeydiyyatdan çıxarılma proseduru, ev ünvanının dəyişdirilməsi onların hüquqlarının pozulması deməkdir.
