Xətai rayonunda sakin binanın dam örtüyündən şikayət edir. Bu haqda bu gün, 1 dekabr tarixində Bakuplus.az ATV-yə istinadən xəbər verir.
Söhbət rayonun Xudu Məmmədov küçəsi, 19 ünvanından gedir. Doqquzmərtəbəli binada yaşayan sakinlərdən biri iddia edir ki, dam örtüyündən sızan su onun mənzilini yararsız vəziyyətə salıb. Bundan əlavə, tikilinin fasadı qəzalı vəziyyətdədir və qırıntılar hər an insanların başına düşə bilər.
“Dəfələrlə şikayət etmişik. Bilmirik, su haradan axır. 8-ci mərtəbəyə kimi düşür”, – deyə sakin şikayət edib.
Əraziyə cavabdeh olan 82 saylı mənzil kommunal sahəsinin rəisi Rəşad Eldarzadə məsələ ilə bağlı bildirib ki, problem dam örtüyü ilə bağlı deyil.
“Həmin otaq mətbəx olub. Xanım isə oranı yataq otağı edib. Pəncərələr bağlı saxlanıldığından hava dövr etmədiyinə görə bacada buxar yaranır”, – deyə o, əlavə edib.
Binanın əsaslı təmir olunması ilə bağlı isə aidiyyati qurumlara müraciət olunub. Gələn ilin ilk rübündə binada əsaslı təmir işlərinin aparılması gözlənilir.
