Xətai rayonu, Seyid Əzim Şirvani küçəsində yerləşən binaya uzun illərdir çıxarış verilmir. Bu haqda bu gün, 30 aprel tarixində Bakuplus.az Real TV-yə istinadən xəbər verir.
“Hidayət” MTK-nın inşa etdiyi binanın sakinləri 14 ildir evlərinə çıxarış ala bilmirlər.
“Gedirik, deyirik: “Çıxarış ver”. Deyir: “Sizin elə-belə də canınızı alacağam”. 74 yaşım var, ölsəm, evim havada qalacaq”, – deyə sakinlərdən biri şikayət edir.
Bundan əlavə, binanın lifti də baxımsız vəziyyətdədir.
“Hər gün liftimiz xarab olur, günlərlə işləmir. Çox əziyyət çəkirik”, – deyə sakinlər əlavə edirlər.
MTK-nın sədri olduğu bildirilən Venera Rüstəmova məsələ ilə bağlı bildirib ki, binanın idarəçiliyi tam sakinlərin səlahiyyətindədir.
“İdarəçilik onların əlindədir. Kommunal yığımı, liftin işləyib-işləməməsi onların səlahiyyətindədir. Amma bugünkü gün yenə də hansısa xərclər mən tərəfdən ödənilir. Misal üçün qaraja su yığılması ilə bağlı pul yığırlar, “Azərsu”ya pul ödəmirlər, çek də durur, mən ödəmişəm. Sakinlər gəlib dedilər ki, evlərinə su damır. Damda aparılan işlərə hardasa 5000-ə yaxın pulumuz çıxdı. Bunların hamısını onlar etməlidirlər, amma etmirlər. Lift üçün 240 mənzildən 100 AZN-dən pul yığdılar, hələ obyektlərdən də pul yığırlar. Ortaya heç bir şey çıxmadı”, – deyə sədr vurğulayıb.
Çıxarış məsələsi ilə bağlı isə işlərin artıq yekunlaşmaq üzrə olduğu qeyd olunub.
“Çox az müddət qalıb. Sadəcə qarşı tərəfdən asılıdır ki, çəkilsinlər, bizə mane olmasınlar, bu münaqişə dayansın və biz çıxarışımızı alaq”.
