Xətai rayonu, Əliağa Şıxlinski, 30 ünvanında sakinlər şəraitsizlikdən şikayət edirlər. Bu haqda bu gün, 8 may tarixində Bakuplus.az ARB-yə istinadən xəbər verir.
Bildirilir ki, kanalizasiya suları birbaşa binanın zirzəmisinə axıdılır, küçələr və bloklar isə baxımsız vəziyyətdədir. Sakinlərin sözlərinə görə, mərkəzləşdirilmiş istilik sistemi işləmir, içməli su isə müəyyən saatlarda gəlir.
Həmçinin kanalizasiya xətti işləmədiyindən sakinlər fərdi xətlər çəkməyə məcbur olublar.
“Söz vermişdilər ki, 24 saat su olacaq. Onu da 4-5 saat verirlər ancaq. Bloklar uçur gedir. Zirzəmidə 1 metr su var. Binada deşiklər açmışıq ki, qoxu evlərə dolmasın”, – deyə sakinlər bildirirlər.
Bundan əlavə, zirzəmidə elektrik naqilləri təhlükəli vəziyyətdədir. Bu da hər an qısaqapanma və yanğına səbəb ola bilər.
“Azərsu”dan verilən məlumata görə, sözügedən ünvanda 10 metrə yaxın çuqun kanalizasiya xətti oğurlanıb. Yaxın zamanda həmin xətlər bərpa olunacaq.
