Bakının Xəzər rayonunda abadlıq və quruculuq işləri davam etdirilir. Bu haqda Rayon İcra hakimiyyətinin mətbuat xidməti bu gün, 1 iyun tarixində məlumat verib.
Rayonda yol-nəqliyyat infrastrukturu yaxşılaşdırılır, əhalinin kommunal xidmətlərlə, o cümlədən elektrik enerjisi, qaz və su ilə təminatı, səhiyyə və təhsil müəssisələrinin tikintisi və yenidən qurulması istiqamətində tədbirlər həyata keçirilir. Həmçinin rayonda yeni parklar, yaşıllıq zolaqları salınır, küçə və prospektlər abadlaşdırılır.
Belə ki, Xəzər rayonunun Qala-Şüvəlan qəsəbələrarası avtomobil yolunun yenidən qurulması həyata keçirilir. Yolun 1200 metrlik hissəsində işlər yekunlaşmaq üzrədir.
Eyni zamanda, Bakı şəhərində qəsəbələrin yenidən qurulması işləri çərçivəsində “Bakı Abadlıq Xidməti” MMC tərəfindən Mərdəkan qəsəbəsinin mərkəzi küçəsində, Sergey Yesenin və Hacı Zeynallabdin Tağıyev küçələrində yenidənqurma işləri aparılır. Küçələrdə vətəndaşlara məxsus ticarət və xidmət obyektlərinin divarları, hasarları, darvazaları, fasadları təmir olunur.
Bundan əlavə, Buzovna-Mərdəkan avtomobil yolunda yeni velosiped yolları və piyada səkiləri tikilir. Hazırda bu istiqamətdə işlər davam etdirilir.
Rayonda mövcud abadlıq-quruculuq işlərinə, ağacların və gül kollarının suvarılmasına, qazonların biçilməsinə, alaq otlarının təmizlənməsinə və ətraf ərazinin təmizlənməsinə xüsusi diqqət yetirilir.
Bu ilin İnvestisiya Proqramına uyğun olaraq Xəzər rayonunun Mərdəkan, Binə, Buzovna, Qala və Zirə kəndlərində 26,5 kilometr küçə və yolların təmiri nəzərdə tutulub.
