Xəzər rayonunda qanunsuz su sərfiyyatı faktı aşkarlanıb. Bu haqda bu gün, 21 iyul tarixində Bakuplus.az “Azərsu”ya istinadən xəbər verir.
Zirə qəsəbəsi, Müslüm Maqomayev küçəsində Əbülfəz Əlizadəyə məxsus həyət evində suyun talandığı məlum olub. Belə ki, həyət evinin sahibi küçədə yerləşən və yanğın təhlükəsizliyi üçün nəzərdə tutulmuş hidrantdan həyətinə qanunsuz su xətti çəkib. Hidrantın üzərinə isə torpaq tökərək onu gizlədib. Daha sonra o, kustar üsulla yaratdığı sudoldurma məntəqəsində 3 sudaşıyan maşınla qanunsuz olaraq su satışı həyata keçirib.
Vətəndaşa məxsus məntəqə ləğv edilib, məsul şəxslər məsuliyyətə cəlb olunublar. Cari ilin ilk 6 ayında Xəzər rayonu üzrə 999 sudan qanunsuz istifadə halları aşkarlanıb, 100-ə yaxın fakt araşdırılması üçün hüquq-mühafizə orqanlarına təqdim olunub.
