Martın 14-16-da Azərbaycanın paytaxtında XI Qlobal Bakı Forumu keçiriləcək. Bu barədə 5 yanvar tarixində Trend məlumat verib.
Forum Nizami Gəncəvi Beynəlxalq Mərkəzinin təşkilatçılığı ilə baş tutacaq. Tədbirdə 400-ə yaxın dünyaca məşhur peşəkar, eləcə də keçmiş və hazırkı dünya liderləri, nazirlər və Nobel mükafatı laureatları iştirak edəcəklər.
Qeyd edək ki, 2023-cü ilin mart ayında keçirilən əvvəlki Qlobal Bakı Forumunda dörd prezident, iki baş nazir, altı spiker və nazir, BMT sisteminə daxil olan beş təşkilatın rəhbərləri, 25 keçmiş prezident, 21 keçmiş baş nazir və 23 ölkənin xarici işlər nazirlərinin müavinləri iştirak etmişdilər. Forum 61 ölkədən 360 nümayəndənin iştirakı ilə yadda qalıb.
