YARAT müasir incəsənət məkanı XX-XXI əsrlər Azərbaycan Rəssamlıq Muzeyində “METACODE” (“METAKOD”) adlı sərgi layihəsini bu gün, 7 dekabr tarixində təqdim edəcək. Bu haqda bu gün, 7 dekabr tarixində Bakuplus.az məlumat verir.
Sərgidə Rasim Babayev, Rəşad Babayev, Hüseyn Cəlilov, Teymur Daimi, İrina Eldarova, Ənvər Əsgərov, Hüseyn Haqverdiyev, Orxan Hüseynov, Fərhad Xəlilov, Zaur Kantemirov, Leyla Qabulova, Tərlan Qorçu, Sənan Qurbanov, Aidə Mahmudova, Məmməd Mustafayev, Mir Nadir Zeynalov və “043” (Mövsüm və Ramil) yaradıcılıq kollektivi kimi müxtəlif nəsillərdən olan azərbaycanlı rəssamların əsərləri nümayiş olunur.
Fərəh Ələkbərli, Şirin Məlikova və Səbinə Şıxlinskayanın kuratorluq etdiyi sərgi gələn il aprelin 30-dək ziyarətçilər üçün açıq olacaq.
“METACODE” sərgisi 20 azərbaycanlı rəssamın müxtəlif dövrlərə aid əsərlərini bir araya gətirir, onların əsərlərində xalqın mədəni kodlarını açır. Layihə-tədqiqat işinin kurator konsepsiyası incəsənətin müxtəlif sahələrində bu günə qədər gəlib çatmış cizgi və simvolların gizli dili kimi mədəni kodun transformasiyası nəzəriyyəsinə əsaslanır.
Ekspozisiya yeni əsrin rəssamları ilə dialoqda olan “perestroyka” dövrü rəssamlarının əsərlərinə əsaslanır.
