YARAT İncəsənət Mərkəzində “Tənhalıq” mövzusunda müzakirələr aparılacaq. Bu haqda bu gün, 13 oktyabr tarixində Bakuplus.az mərkəzə istinadən xəbər verir.
“Tənhalıq: Şəxsiyyətin yolu" adlı müzakirədə tənhalıq şəxsiyyət, ələlxüsus da yaradıcı şəxsiyyət üçün niyə həmişə ziyanverici olmur? Tənhalıq və özünüdərketmə dövrləri mənəvi inkişafın təməlini qoymağa necə kömək edir? kimi sahələrə toxunulacaq.
Tədbirdə Fotoqraf Eltac Zeynalov və klinik psixoloq Günel Muradova iştirak edəcəklər.
37 yaşlı Eltac Zeynalov fotoqraf kimi fəaliyyət göstərir. Yaradıcılığı sosiologiyaya və hər bir insanın keçirdiyi hisslərə fokuslanıb. O, həmçinin küçə fotoqrafiyası ilə də məşğuldur.
Günel Muradova Liverpul Universitetində (İngiltərə) Psixi sağlamlıq psixologiyası üzrə magistr dərəcəsi alıb, həmçinin Nova Tibb Universitetində (Portuqaliya) Psixi sağlamlıq strategiyası və xidmətləri üzrə birillik proqramın iştirakçısıdır. 11 ildir SN Psixi Sağlamlıq Mərkəzində klinik psixoloq vəzifəsində çalışır, 3 ildir Azərbaycan Tibb Universitetində psixologiya, tədqiqat metodları, biostatistika və psixometriya fənlərini tədris edir.
