Bakıda böyüklər üçün master-klaslar keçiriləcək. Bu haqda bu gün, 5 mart tarixində Bakuplus.az YARAT-a istinadən xəbər verir.
“Özünü kəşf et” adlı layihə “YARAT” incəsənət mərkəzində baş tutacaq. Ustad dərslərinin proqramı aşağıdakı kimidir:
- 6 mart – “Keramika sənəti”. Tütor Ramina Boçarova olacaq. Rəssam öz təcrübəsi ilə bölüşüb, iştirakçılara bədii potensiallarını kəşf etməyə kömək edəcək. Ustad dərsi zamanı iştirakçılar gildən heykəllər yaradacaqlar;
- 13 mart – “Abstraksiya vasitəsilə azadlığa doğru”. Tütor Vüsal Rəhim olacaq. İştirakçılar kətan üzərində boyalarla abstrakt kompozisiya yaratmaqla öz yaradıcılıq azadlığını ifadə etmək imkanı əldə edəcəklər;
- 27 mart – “Bədii iz”. Tütor Gülnarə Ələkbərli olacaq. İştirakçılar öncə linoqravür texnikası ilə tanış olacaqlar. Daha sonra linoleum səthində öz unikal kompozisiyalarını kəsərək onu kağız üzərinə köçürəcəklər.
Master-klaslara qatılmaq üçün yaş həddi 16 və yuxarıdır. Məşğələlər saat 19:00-da XX-XXI əsrlər Azərbaycan Rəngkarlığı Muzeyində başlayacaq.
İştirak üçün qeydiyyatdan keçmək lazımdır. Qatılmaq istəyən şəxslər çərşənbə axşamından bazar gününə kimi saat 11:00-dan 18:00-dək (050) 251 41 15 nömrəsi ilə əlaqə saxlaya bilərlər.
