Bakının Yasamal rayonunda vətəndaşlar səkinin zəbt olunmasından narazıdırlar. Bu haqda bu gün, 18 may tarixində Bakuplus.az ATV-yə istinadən xəbər verir.
Mirzəağa Əliyev küçəsində yerləşən restoranın qarşısında piyadalar üçün nəzərdə tutulan səki avtomobil sürücüləri tərəfindən zəbt olunub, həmçinin orada olan velosiped zolağında quraşdırılan baryerlər də sökülüb.
“Xüsusən avtomobillər burada axşam saatlarında park olunur. Bu vəziyyətə görə biz həyatımızı riskə ataraq avtomobil yoluna çıxmağa məcbur oluruq”, – deyə vətəndaşlar şikayət edirlər.
Restoranın əməkdaşı isə bildirib ki, baryerlərin yoxa çıxmasında onlar günahkar deyillər.
“Buraya yaxın ərazidə yaşayan və işləyən insanlar avtomobilləri burada saxlayırlar. Nə müştəri, nə də əməkdaşlar burada nəqliyyat vasitələrini saxlayırlar. Qırılan baryerləri yığıb saxlamaşıq özümüzdə”, – deyə o qeyd edib.
Bakı Şəhər Dövlət Yol Polisi İdarəsinin (BŞDYPİ) bölmə rəisi Toğrul Nəsirli bildirib ki, restoranın qarşısında avtomobillərin dayanması və durması qadağandır. Orada avtomobillərini saxlayan sürücülər 20 manat məbləğində cərimə olunacaqlar.
Azərbaycan Yerüstü Nəqliyyat Agentliyinin mətbuat katibi Tural Orucov isə bildirdi ki, dövlət əmlakına ziyan vurulması ilə bağlı hüquq-mühafizə orqanlarına müraciət olunub.
