Bakının Yasamal rayonu, Süleyman Tağızadə küçəsində hərəkət edən piyadaların həyatı hər an təhlükədədir. Bu küçədə yerləşən və yaşı bir əsrdən çox olan yaşayış binasının eyvanı qəzalı vəziyyətdədir və hər an uçma təhlükəsi var. Bu haqda bu gün, 24 iyun tarixində Bakuplus.az ATV-yə istinadən məlumat verir.
1926-cı ildə inşa olunan binada indiyə kimi təmir işləri aparılmayıb. Bu illər ərzində binanın həm fasad hissəsi, həm də eyvanı dağılıb. Bundan başqa, eyvan gündəlik gediş-gəliş yolunun üzərində yerləşdiyindən burada yaşayanlar üçün də ciddi təhlükə yaradır.
“Təmir-bərpa olunmasına ehtiyac var. Mərkəzdir, buralar düzəlməlidir. Deyirlər, guya gəlib təmir edəcəklər, gözləyirik”, – deyə sakinlər bildiriblər.
Yasamal rayonu Mənzil-Kommunal Təsərrüfat Birliyindən bildirildi ki, cari ildə əsaslı təmir olunmasına ehtiyacı olan digər ünvanlarla yanaşı, qeyd olunan ünvan da titul siyahısında və qəzalı eyvanlar üçün ayrıca tərtib edilmiş siyahıda nəzərə alınıb. Aidiyyəti qurumlar tərəfindən yaxın zamanda müvafiq tədbirlər görüləcək.
