Yasamal rayonu, Şərifzadə küçəsi, 67 ünvanında lift təhlükəli vəziyyətdədir. Bu haqda bu gün, 4 aprel tarixində Bakuplus.az Real TV-yə istinadən xəbər verir.
Sakinlərin sözlərinə görə, 1974-cü ildə istifadəyə verilən 84 mənzilli binanın lifti istifadəyə yararsızdır. Onlar liftə girməyə qorxurlar və mərtəbələrə ayaqla çıxmalı olurlar. Sakinlərə Fövqəladə Hallar Nazirliyindən də bildirilib ki, liftdən istifadə məqsədəuyğun deyil.
“Gözləyirlər ki, hadisə baş versin, sonra gəlsinlər. FHN-dən dedilər ki, hər an qəza baş verə bilər. Çox vaxt pilləkənlərdən istifadə edirik”, – deyə sakinlər bildirirlər.
Doqquzmərtəbəli binada lift yalnız 4 mərtəbədə dayanır. Sakinlər öz hesablarına bəzi kosmetik işlər görsələr də, tam təmirin onların gücündə olmadığını deyirlər.
Binanın sahibi olan “Buta” Məhdud Məsuliyyətli Müəssisədən bildirilib ki, onların lifti dəyişməyə imkanı yoxdur. Bakı Lift-Təmir İstehasalat Birliyi isə onlardan bəzi sənədlər tələb edir ki, həmin sənədlər MMC-də yoxdur. Müəssisə çıxış yolunu sadəcə binanın dövlətin hesabına keçirilməsində gördüyünü deyir.
Bakı Lift-Təmir İstehsalat Birliyi isə binanın onların balansına keçirilməsinin qeyri-mümkün olduğunu vurğulayır.
