Yasamal rayonu, Haqverdiyev, 1 ünvanında yaşayan 300 nəfərə yaxın 36 ailə mənzillərini isitmək üçün alternativ vasitələrdən istifadə etsələr də, otaqları qızdırmaq mümkün olmur. Bu haqda bu gün, 18 yanvar tarixində Bakuplus.az ATV-yə istinadən məlumat verir.
İstiliyin olmamasından evlərdə nəmişlik yaranıb. Buna görə də sakinlər mənzillərini təmir etmək məcburiyyətində qalırlar. Evini qızdıra bilməyən sakinlər daha çox elektrik enerjisindən istifadə etdiklərinə görə aylıq xərclər də artıb. Üstəlik, soyuqdan xəstələnənlərin dərman xərcləri də yaranır.
Sakinlərə verilən bütün çıxarışlarda mənzillərin istiliklə təmin olunduğu göstərilir. Həmçinin hər bir mənzildə istilik xətləri və qızdırıcılar da quraşdırılıb.
“Azəristiliktəchizat” ASC-dən bildirildi ki, sözügedən binanın qazanxanası yoxdur və həmin bina onların balansında deyil.
Yasamal RİH-dən isə deyildi ki, sözügedən bina Yasamal Mənzil Kommunal Təsərrüfatı Birliyinin balansındadır. Büdcədən vəsait ayrılan kimi tək o bina deyil, yaxınlığındakı digər binalar üçün də qazanxana tikilərək sakinlərin istilik probleminə son qoyulacaq. Bunun nə vaxt baş verəcəyi ilə bağlı sual isə cavabsız qalıb.
