Ötən gün xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələrində dəyişiklik edilib.
Qərar yerli istehsalçılardan daxil olan müraciətlər nəzərə alınmaqla, yerli istehsalın rəqabət qabiliyyətinin artırılması, daxili bazarın qorunması, o cümlədən yerli sahibkarlara dövlət dəstəyinin daha da gücləndirilməsi məqsədilə hazırlanmışdır.
Qəbul edilən Nazirlər Kabinetinin 453 nömrəli Qərarına əsasən 30.06.2026-cı il tarixinədək təhlükəsizlik ayaqqabılarının idxalına tətbiq olunan gömrük rüsumları 15% dərəcəsindən artırılaraq spesifik rüsum formasında 1 cüt üçün 9 ABŞ dolları məbləğində müəyyən olunur.
Bəs görəsən, bu qərarın iqtisadiyyata nə kimi təsirləri olacaq?
Mövzu ilə bağlı Bakuplus.az-a açıqlama verən iqtisadçı Emin Qəriblinin sözlərinə görə, bu qərar dayanıqlı inkişafa xidmət edəcək:
“Nazirlər Kabinetinin qərarlarına diqqət yetirsək, əksəriyyəti məhz bizdə iqtisadiyyatın şaxələndirilməsinə və ixracat potensialımızın artırılmasına xidmət edir. Bir çox məhsullar var ki, müqayisəli üstünlüyə malikdir, bazarda təklif çoxdur. Hesab edirəm ki, dövlət seçilmiş istiqamət üzrə müvafiq addımlar atır. Məhsulların rüsumlarını artırır.
Digər tərəfdən, elə məhsullar var ki, onların uçotu aparılır, məsələn, təhlükəsiz ayaqqabılar. Daha keyfiyyətli məhsulların gətirilməsi üçün bu addımlar atılır. Və hesab edirəm ki, düzgün addımdır. Bu, bizim dayanıqlı inkişafımıza xidmət edəcək”.
Ekspert qeyd edib ki, digər ölkələrdən gələn keyfiyyətsiz məhsullardan qorunmaq üçün müvafiq qaydalara riayət olunaraq bizdə ayaqqabılar hazırlanacaq:
“Müəyyən standartlar var. Həmçinin bu, idxalın yerli məhsullarla əvəzlənməsinə yönələn bir prosesdir. İstər tikinti, istərsə də neft sənayesində geniş yayılmış təcrübədir. İstərdik ki, sözügedən məhsul bizdə də istehsal olunsun. Bu sahənin inkişafına ehtiyac var”.
Nəzrin Vahid
