Suraxanı rayonu, Yeni Günəşli qəsəbəsi, AB massivindəki küçə baxımsız vəziyyətdədir. Bu haqda bu gün, 30 mart tarixində Bakuplus.az Real TV-yə istinadən xəbər verir.
Belə ki, ərazi xarabalığı xatırladır. Uçub-dağılan pilləkənlər, olmayan məhəccərlər, azyaşlılar üçün hər an təhlükə saçan yelləncəklər sakinlərin şikayətinə səbəb olur. Onlar son 10 ildir bu vəziyyətdə yaşayırlar.
“Pilləkənlər tökülür, işığımız yanmır, oturacaqlar qırılıb. Baxan yoxdur bura. İşıq yanmır deyə oğurluq çox olur. Maşının təkərləri, elektrik kabelləri, hamısı yox olur. Ölünü maşınların işığı ilə qaldırmışıq”, – deyə sakinlər şikayət edirlər.
Suraxanı rayon İcra Hakimiyyəti məsələ ilə bağlı bildirib ki, hazırda həmin ərazidə abadlıq işlərinə başlanılıb. Sözügedən küçədə də aprel ayının ortalarından yenidənqurma işləri başlayacaq.
