Yeni Suraxanı qəsəbəsinin 14 iyul küçəsində yaşayan sakinlərin yol problemi uzun müddətdir ki, həll olunmur. Onlar bildirirlər ki, bu problemlə bağlı dəfələrlə İcra hakimiyyətinin qəbulunda olublar, eyni zamanda səyyar qəbul zamanı onlara tezliklə bu əraziyə asfalt örtüyünün çəkiləcəyi vədi verilib, lakin vəziyyət hələ də acınacaqlı olaraq qalır. Bu haqda bu gün, 27 yanvar tarixində Bakuplus.az ATV-yə istinadən məlumat verir.
Suraxanı Rayon İcra Hakimiyyətinin (RİH) təsərrüfat şöbəsinin müdiri Mehman Hüseynov bildirdi ki, həmin ünvanda yolun asfaltlanması ilə bağlı aidiyyəti üzrə müraciət olunub. Rayon üzrə asfaltlanmaya ehtiyacı olan küçələrin sayı çox olduğundan proses uzanır.
“Aidiyyəti təşkilatlar tərəfindən mərhələli şəkildə bu işlər görüləcək. Hal-hazırda 2019-2023-cü illərin proqramına əsasən, rayonda ümumi asfaltlanmasına ehtiyac olan 2.500.000 kvadratmetrdən 1 milyon kvadratmetrdən artıq asfalt işləri görülüb”, - deyə qurumun rəsmisi deyib.
Məsəlı ilə bağlı “Azəravtoyol”un sözçüsü Anar Nəcəfli bildirib ki, qəsəbədaxili küçə və yollar yerli RİH strukturlarının balansındadır. Agentlik tərəfindən olan investisiya proqramından kənar hər hansı bir xidmət göstərilmir. Yalnız yerli icra strukturlarının təqdimatı əsasında müəyyən ərazilər investisiya proqramına daxil edilir. Qeyd olunan ərazi ilə bağlı yerli icra strukturları tərəfindən də aidiyyəti üzrə müraciət olunmalıdır ki, sözügedən küçə və yol investisiya proqramına daxil edilsin.
Müraciətlə bağlı Suraxanı RİH-dən qeyd edildi ki, bu proses çoxdan həyata keçirilib. Sadəcə qalıb müvafiq qurumun qərar verib, sakinləri yolsuzluq problemindən xilas etməsi.
