Vətəndaşlar yeni tikilən binadan bir otaqlı mənzil aldıqdan sonra onu 2-3 otaqlı edərək satışa çıxarırlar. Mənzildə mətbəx və sanitar qovşağının yeri dəyişdirilir, arakəsmələr yenilənir. Bəziləri, hətta istinad divarına müdaxilə edirlər. Bu haqda bu gün, 25 noyabr tarixində Bakuplus.az Xəzər Xəbər-ə istinadən məlumat verir.
Əmlak üzrə ekspert Elnur Fərzəliyevin sözlərinə görə, bir çox hallarda bu cür dəyişiklik qaydalara uyğun aparılmır və problemlərə yol açır.
Ekspert bildirib ki, tikinti normalarına əsasən, qaz xətləri otaqlara daxil olmadan birbaşa mətbəxə aparılmalıdır. Yerdəyişmə zamanı isə həmin xətlər bir neçə otaqdan keçirilir. Bu da mənzildə yaşayanlar üçün potensial təhlükə deməkdir. Eyni zamanda arakəsmələrin yerinin dəyişdirilməsi binanın ümumi yüklənməsini də artırır. Elnur Fərzəliyevin sözlərinə görə, bu normalar bəzən tikinti şirkətləri tərəfindən də pozulur.
“Tikinti şirkətləri daha böyük ümumi sahəsi olan mənzilləri sata bilmədikdə həmin mənzilləri bölərək bir neçə mənzilə çevirirlər. Əksər hallarda digər mənzillərin hər hansı birində sanitar qovşağın yeri dəyişilmiş olur, mətbəxin yeri dəyişilmiş olur, buna da əsas səbəb tikinti şirkətlərinin ərazilərinə uyğun verdikləri standartdan kənar layihələrdir. Daxili konstruksiya dəyişikliyi, eyvanların bağlanması və yaxud digər dəyişikliyə mövcud vəziyyətdə aidiyyati qurumlar tərəfindən nəzarət olunmur”, – Fərzəliyev əlavə edib.
Ekspert onu da qeyd etdi ki, 1 otaqlı mənzil 2 otaqlıya dəyişdirildikdən sonra qiyməti 15-20 faiz artır. Ona görə də vətəndaşlar ev alarkən belə məsələlərdə diqqətli olmalıdırlar ki, sonradan problemlə üzləşməsinlər.
