Bakının Yasamal rayonu, Yeni Yasamal qəsəbəsində piyadalar üçün səki salınmayıb. Bu haqda bu gün, 1 fevral tarixində Bakuplus.az ATV Show-ya istinadən xəbər verir.
Söhbət 7-ci Alatava adlanan ərazidən gedir. Burada avtomobil yolu olsa da, piyadaların hərəkəti üçün şərait yoxdur. Sakinlər ya torpaq yolla getməyə, ya da avtomobil yoluna çıxmağa məcbur olurlar. Bu da onların həyatı üçün təhlükə yaradır.
“Burada mütləq səki olmalıdır. Neçə dəfə olub ki, avtomobillər az qala adamları vursun”, – deyə sakinlər bildiriblər.
Sürücülər də bu ərazidə səkilərin olmasını istəyirlər. Onlar piyadaları vurma təhlükəsinin yüksək olduğunu vurğulayırlar.
Yasamal Rayon İcra Hakimiyyətindən (RİH) deyildi ki, məsələ ilə bağlı müvafiq sənədlər qurumlara artıq təqdim edilib.
Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli isə bildirdi ki, əgər ərazidə piyada səkisinə ehtiyac varsa, bununla bağlı layihə təsdiqlənməli və daha sonra işlərə başlanılmalıdır.
