Yasamal rayonunda sakinlər yollarının zəbt olunmasından narazıdırlar. Bu haqda bu gün, 11 iyul tarixində Bakuplus.az Oxu.az-a istinadən xəbər verir.
Şikayət Yeni Yasamal yaşayış massivindən gəlir. Belə ki, Dadaş Bünyadzadə küçəsində piyada səkisi meyvə-tərəvəz satışı ilə məşğul olan alverçilər tərəfindən tamamilə zəbt olunub. Sakinlərin sözlərinə görə, hərəkət edə bilməməklə yanaşı, daimi antisanitariya və satıcıların bir-biri ilə mübahisələri onları təngə gətirib.
Daha bir problem Dadaş Bünyadzadə küçəsinin Əsəd Əhmədov küçəsi ilə kəsişməsində var. Burada taksi sürücüləri avtomobillərini birbaşa piyada zolağının üstündə park edirlər. Sakinlər nə qədər irad bildirsələr də, sürücülər onlara məhəl qoymurlar.
Daha öncə həmin ərazidə xaosun hökm sürməsi ilə bağlı məlumat verilmişdi.
