Bakının Sabunçu rayonu, Zabrat-2 qəsəbəsinin Murad Mirzəyev küçəsində sakinlər yollardan şikayət edirlər. Bu haqda bu gün, 17 yanvar tarixində Bakuplus.az Xəzər Xəbər-ə istinadən xəbər verir.
Sözügedən ərazidə asfalt örtüyü olmadığından yağıntılı havada hərəkət çətinləşir. Sakinlərin sözlərinə görə, bu küçə sonuncu dəfə 15 il əvvəl asfaltlanıb. Əraziyə gələn avtobuslar və təcili tibbi yardım maşınları mənzilbaşına çətinliklə çatırlar.
“Bizə söz veriblər ki, asfalt çəkiləcək, amma indiyə kimi heç nə etməyiblər. 15 dəqiqəlik yolu 1 saata gedirik. Məktəbə gedən uşaqlar çətinlik çəkirlər, kimin maşını var, onlar bir təhər çatırlar, kimdə yoxdursa, 2 saat durub avtobus gözləyir”, – deyə sakinlər şikəyət edirlər.
Məsələ ilə əlaqədar Azərbaycan Avtomobil Yolları Dövlət Agentliyindən (AAYDA) bildirilib ki, daxili küçə və yollara agentlik tərəfindən xidmət göstərilmir.
Rayon İcra Hakimiyyətindən verilən məlumata əsasən, yolların təmiri ilə bağlı 1 il əvvəl AAYDA-ya məktubla artıq müraciət olunub.
