Bakının Sabunçu rayonu, Zabrat qəsəbəsində yerləşən dairə avtoqəzaların mənbəyinə çevrilib. Bu haqda bu gün, 27 noyabr tarixində Bakuplus.az ATV News-a istinadən xəbər verir.
Sakinlərin sözlərinə görə, quraşdırılan yol nişanları sürücülər üçün çətinlik yaradır. Bu səbəbdən onlar heç bir yol nişanının tələblərinə əməl etmirlər. Hətta kimsə nişanı sökərək kənara atıb. Həmçinin sürəti ölçən radarlar olmadığından avtomobillər dairəyə yüksək sürətlə daxil olur. Nəticədə ərazidə tez-tez qəzalar baş verir.
“Dairə 3 ilə yaxındır ki, yaradılıb və ətrafda heç bir kamera quraşdırılmayıb. Ara küçələrdən çıxan sürücülər də dairəyə daxil ola bilməzlər. Niyə axı onlar gedib uzaqdan fırlanıb gəlməlidirlər?!” – deyə sakinlərdən biri şikayət edib.
Məsələ ilə bağlı Azərbaycan Yerüstü Nəqliyyat Agentliyindən (AYNA) məlumat verilib ki, yaxın günlərdə əraziyə baxış keçiriləcək və hərəkətin tənzimlənməsi üçün tədbirlər görüləcək.
Baki Şəhər Dövlət Yol Polisi İdarəsindən (ŞDYPİ) isə qeyd edildi ki, əraziyə kamera və radarların quraşdırılması nəzərə alınacaq.
