Sabunçu rayonu, Zabrat qəsəbəsindəki ikimərtəbəli yaşayış binasının zirzəmisinə mazut dolub. Bu, binada yaşayan 27 ailəni təşviş içində saxlayır. Aidiyyəti orqanlara dəfələrlə şikayətlər ünvanlansa da, bir nəticə yoxdur. Bu haqda bu gün, 1 iyun tarixində Bakuplus.az ATV-yə istinadən məlumat verir.
Zabrat qəsəbəsi, Oktyabr küçəsi, 25 ünvanındakı yaşayış binası 1922-ci ildə neft şirkətinin işçiləri üçün inşa olunub. Binanın zirzəmisinə artıq uzun illərdir ki, hündürlüyü təxminən 2 metr olan mazut dolub və gündən-günə yüksəlməyə davam edir.
Sakinlər deyirlər ki, əvvəllər ərazidə neft mədənləri olub. Daha sonra onların fəaliyyəti dayandırılıb. Dərinliyi 4 metr olan binaların zirzəmisinə dolan da mədənlərdən gələn mazutdur. Nəticədə bina yararsız vəziyyətə düşüb. Aidiyyəti qurumlar isə bir tədbir görməyə tələsmir. Vətəndaşlar narahatdırlar ki, adi bir qığılcımdan binanın od tutub alışması qaçılmazdır.
73 saylı Mənzil Kommunal İstismar Sahəsindən bildirildi ki, Fövqəladə Hallar Nazirliyi (FHN) binanın qəzalı vəziyyətdə olmasına dair akt tərtib etmədiyindən hansısa tədbir görmək mümkün deyil.
Nazirlikdən isə dedilər ki, Tikintidə Təhlükəsizliyə Nəzarət Agentliyi ərazidə mütəmadi yoxlamalar aparır. Qısa zaman ərzində müvafiq rəy veriləcək.
Sabunçu Rayon İcra Hakimiyyətində problemdən xəbərdardırlar. Rayon üzrə 230 qəzalı binanın siyahısı artıq Bakı ŞİH-yə göndərilib. Siyahıda 100 yaşlı binalar da var. FHN-in rəyindən sonra Oktyabr, 25 ünvanındakı bina ilə bağlı lazımi tədbir görüləcək. Hələlik isə söz verilib ki, binanın zirzəmisi təmizlənəcək.
