Bakının Xəzər rayonunun Şağan qəsəbəsində “Ulduz” futbol akademiyasının açılışı olub. Bu haqda bu gün, 23 oktyabr tarixində Bakuplus.az Report-a istinadən məlumat verir.
Tədbirdə Azərbaycanın gənclər və idman naziri Fərid Qayıbov, AFFA-nın baş katibi Sərxan Hacıyev, akademiyanın təsisçisi, futbol veteranı Nazim Süleymanov və başqaları iştirak ediblər.
Mayın 1-də yaradılan futbol akademiyası Şağan Olimpiya İdman Kompleksində yerləşir. Hazırda orada 69 uşaq məşq edir. Seçimdə ölkənin müxtəlif bölgələrindən 800-dən çox uşaq iştirak edib. Artıq AFFA-nın gənclər liqalarında müxtəlif yaş qruplarından ibarət uşaq komandaları çıxış edir.
İdman və Gənclər Nazirliyi “Ulduz” Akademiyasına dəstək verir.
Hazırda akademiyada dörd yaş qrupu üzrə komandalar məşq edir. Rayonlardan gələn uşaqlar “Cırtdan” İstirahət Mərkəzində yeməklə təmin olunaraq yaşayır, 237 nömrəli tam orta məktəbdə təhsil alırlar.
Açılış mərasimində uşaq komandalarının kapitanları çıxış ediblər. Sonra gənc futbolçular futbol meydançasında məharətlərini nümayiş etdiriblər.
