Heydər Əliyev prospektində yerləşən “ASK Arena” sökülə bilər. Bu barədə FutbolPress idman portalı məlumat yayıb.
Saytın məlumatına görə, stadion söküləcək və yerində dövlət obyekti tikiləcək. Lakin prosesin nə vaxt başlayacağı hələlik məlum deyil.
Hazırda ev oyunlarını bu arenada keçirən “Keşlə”nin növbəti mövsümdən “Şamaxı” adı ilə Şamaxıya keçəcəyi açıqlanıb.
ASK Arena çoxfunksiyalı mərkəz olaraq ayrıca oteli, mini-futbol meydançaları, ehtiyat futbol meydançası, hovuzu və idman zallarından ibarətdir. Burada Milli Karate Federasiyası yerləşir, futbol, boks, karate, reqbi və s. seksiyalar fəaliyyət göstərir.
8125 tamaşaçı tutumuna malik kompleksin əsas arenası 2001-ci ildə UEFA-nın vəsaiti hesabına AFFA tərəfindən tikilib və “Şəfa” adlandırılıb. 2014-cü ildə stadion o vaxt “İnter” klubunun (Bakı) sponsoru olan Azərbaycan Beynəlxalq Bankına satılıb. 2017-ci ildə stadion “Azərbaycan Sənaye Korporasiyası” ASC-nin balansına verilib və “ASK Arena” adlandırılıb.
