Bakıda Heydər Əliyevin və Azərbaycan atletikasının 100 illik yubileyinə həsr edilən 100 km məsafəyə ultramarafon yarışı təşkil olunub. Bu haqda bu gün, 25 noyabr tarixində Bakuplus.az Azərbaycan Atletika Federasiyasına istinadən məlumat verir.
Dənizkənarı Milli Park ərazisində baş tutmuş qaçışda Azərbaycan, Türkiyə və Rusiyadan 50-yə yaxın iştirakçı mübarizə aparıb.
Yarış ötən gün saat 03:00-da başlayıb. Kişilər arasında Türkiyə milli komandasının üzvü Üzeyir Söylemez 7 saat 37 dəqiqə 56 saniyə göstərici ilə birinci yeri tutub. Ağa Əliyev 8 saat 31 dəqidə 22 saniyə nəticə ilə ikinci yeri, Artyom Əliyev isə üçüncü yeri tutublar.
Qadınlar arasında Leyla Abdinova 10 saat 57 dəqiqə 57 saniyə nəticə ilə birinci olub, Natalya Vallek 2-ci, Cəmilə İrəfiyeva isə 3-cü yerlərə yüksəliblər.
Qaliblərin mükafatlandırma mərasimində Avropa Atletika Assosiasiyasının prezidenti Dobromir Karamarinov, Gənclər və İdman nazirinin müavini Mariana Vasileva, Azərbaycan Atletika Federasiyasının prezidenti Cavid Qurbanov iştirak ediblər.
Bu, Azərbaycanda 100 km məsafə üzrə ilk dəfə təşkil olunmuş ultramarafon yarışıdır.
