6 noyabr tarixində Bakıda Azərbaycan Respublikası Atçılıq Federasiyası “Binə Atçılıq Mərkəzi”nin açıq manejində “Zəfər” kuboku uğrunda konkur yarışları keçirib. Bu haqda Report xəbər verib.
“E” və “M**” kateqoriyaları üzrə təşkil olunan turnirdə Azərbaycanın müxtəlif atçılıq klublarının yeniyetmə və yetkin yaş qrupları üzrə idmançıları iştirak edib.
“E” kateqoriyası üzrə 80 sm hündürlükdə qurulan maneələrdən ibarət yarışda 20 yaşadək idmançılar yaş məhdudiyyəti qoyulmayan atlarla, 20 yaşdan yuxarı idmançılar isə 6 yaşadək olan atlarla iştirak ediblər.
14 idmançının iştirak etdiyi mübarizədə “Respublika Atçılıq və Müasir Beşnövçülük üzrə İxtisaslaşdırılmış Olimpiya Ehtiyatları Uşaq-Gənclər İdman Məktəbi”, “Buta Qolden Atçılıq Klubu”, “Omar Atçılıq klubu”nun idmançıları qalib gəliblər.
Qaliblər Azərbaycan Respublikası Atçılıq Federasiyasının vitse-prezidenti Bəsirət Quliyev tərəfindən diplom, medal və kubokla təltif ediliblər.
