Paytaxtda cüdo üzrə Bakı birinciliyi start götürüb. Bu haqda BakuPlus.az bu gün, 8 aprel tarixində xəbər verir.
2008-2010-cu il təvəllüdlü idmançılar arasında təşkil olunan yarış Hövsan qəsəbəsində yerləşən Fövqəladə Hallar Nazirliyinin (FHN) İdman-Sağlamlıq Mərkəzində keçirilir.
Turnirdə paytaxt Bakının müxtəlif klublarından, cəmiyyət və təşkilatlardan 800-ə yaxın idmançı gücünü sınayır.
Bu gün oğlanlar arasında 46 kq (75 nəfər), 60 kq (50 nəfər), 34 kq (107 nəfər), qızlar arasında isə 28 kq (3 nəfər), 52 kq (8 nəfər), 40 kq (11 nəfər) çəki dərəcələrində qaliblər müəyyən ediləcək.
Üç gün davam edəcək paytaxt birinciliyində oğlanlar 34, 38, 42, 46, 50, 55, 60, 66, 73, +73 kq, qızlar isə 28, 32, 36, 40, 44, 48, 52, 57, 63, +63 kiloqram çəki dərəcələrində mübarizə aparacaqlar.
Yarışın təşkilində əsas məqsəd perspektivli idmançıları müəyyən edərək onları U-15 yeniyetmələrdən ibarət milli komandaya cəlb etmək, yeniyetmələr arasında idman vasitəsilə sağlam həyat tərzini formalaşdırmaq, cüdonun kütləvi təbliğinə və təşviqinə nail olmaqdır.
