Karate üzrə “Olimpiya ümidləri” layihəsinə start verilib. Bu haqda 8 mart tarixində AZƏRTAC məlumat verib.
Azərbaycan Milli Karate Federasiyası 14-15 yaşlı yeniyetmələrdən ibarət milli komandanın heyətinə daha yüksək səviyyəli idmançılar cəlb etmək məqsədilə “Olimpiya ümidləri” adlı yeni layihəyə start verib.
Layihədə 12-13 yaşlı uşaqlar arasında keçirilmiş respublika çempionatının mükafatçıları iştirak edirlər. Layihə çərçivəsində karateçilərə həftədə bir dəfə tanınmış idmançılar və milli komandaların məşqçiləri tərəfindən xüsusi məşqlər keçiriləcək.
Perspektivli azyaşlı karateçilərə növbəti həftələrdə Niyazi Əliyev, Rafael Ağayev, İrina Zaretska, Şahin Xudaverdiyev, Anar Allahverdiyev, Qurban Tağıyev və Denis Morozov kimi karate mütəxəssisləri dərs keçəcəklər. Beynəlxalq dərəcəli hakim Cahangir Babayev isə onlara yarış qaydaları və yeniliklərlə bağlı məlumatlar verəcək.
