Onlayn yolla dələduzluq edən şəxslər tutulublar. Bu haqda bu gün, 2 avqust tarixində Bakuplus.az Daxili İşlər Nazirliyinə istinadən xəbər verir.
Şübhəli şəxslər sosial şəbəkələrdə “kreditə pul verilir”, “onlayn qazanc”, “az xərclə çox qazan” və digər başlıqlar altında səhifələr açaraq vətəndaşlara müxtəlif vədlər veriblər. Pul aldıqdan sonra isə həmin şəxsləri bloklayaraq pulları mənimsəyiblər.
Aparılan əməliyyat zamanı Bakı şəhər sakini, əvvəllər məhkum olunmuş 30 yaşlı Kənan Əmrahlı, eləcə də 20 yaşlı Raqif Məmmədov, 29 yaşlı Zahir Xalidoğlu və 28 yaşlı Emin İsmayılov şübhəli qismində saxlanılıblar. Onlar törətdikləri əməli etiraf ediblər.
Araşdırmalar davam edir.
Dəstə üzvlərinin qanunsuz əməllərindən zərər çəkən başqa vətəndaşlar varsa, “102” Xidməti Zəng Mərkəzinə və nazirliyin sosial şəbəkələrdəki rəsmi səhifələrinə məlumat verə bilərlər.
