Bakıda qadını və onun iki azyaşlı uşağını qətlə yetirməkdə təqsirləndirilən Əhəd Əliyevin cinayət işi üzrə məhkəmə istintaqı başa çatıb. Bu haqda bu gün, 26 aprel tarixində Oxu.az məlumat verib.
Bakı Ağır Cinayətlər Məhkəməsində hakim Rahib Salmanovun sədrliyi ilə keçirilən prosesdə hökm oxunub. Qərara əsasən, Əliyev ömürlük azadlıqdan məhrum edilib.
Hadisə Nizami rayonu, 8-ci kilometr qəsəbəsində ötən il fevralın 20-də baş verib. 39 yaşlı Gülnar Qaraxanova, onun övladları - 14 yaşlı Lamiyə Qaraxanlı və 11 yaşlı Ataxan Qaraxanlı kirayə yaşadıqları evdə kəsici-deşici alətlə qətlə yetiriliblər.
İstintaq zamanı məlum olub ki, Qaraxanovanın bacısının əri, 41 yaşlı Əhəd Əliyev baldızının ərinin ölkə xaricində olmasından istifadə edərək pul oğurlamaq məqsədilə cinayət törədib. Onun 23.000 manat borcu olub. Çıxış yolu kimi Əliyev qohumunu öldürmək və əldə etdiyi pulla borcunu bağlamaq istəyib. Həmin şəxsin evdən apardığı pulun bir hissəsi olan 20.000 manat ondan dəlil kimi aşkar edilərək götürülüb.
Əhəd Əliyev DİN-in əməkdaşları tərəfindən Quba ərazisindən ölkəni tərk etmək istəyərkən saxlanılıb. Faktla bağlı Nizami rayon prokurorluğunda Cinayət Məcəlləsinin "İki və ya daha çox şəxsi öldürmə" maddəsi ilə cinayət işi başlanıb. Məlum olub ki, Əliyev təxminən 2007-ci ildən 2014-cü ilə qədər Sabirabadda məktəb direktoru vəzifəsində çalışıb.
