Bakıda uşaq sığınacağına basqın edilib. Bu barədə Azərbaycan Uşaqlar Birliyinin sədri Kəmalə Ağazadə ötən gün, 6 avqust tarixində məlumat verib.
Məlumata görə, naməlum şəxslər Azərbaycan Uşaqlar Birliyi - Uşaq Sığınacağı Reinteqrasiya Mərkəzinə hücum ediblər.
Ağazadənin sözlərinə görə, həmin gün səhər saatlarında sığınacağa iki dilənən azyaşlı uşaq yerləşdirilib, əməli törədənlər isə onların valideynləridir.
“Ana deyir ki, diləndirirəm, əcəb edirəm. Ata isə özünü yandıracağını bəyan edir. Bu uşaqlar isə təhlükəsiz yaşamaq, təhsil almaq haqqına sahibdirlər. Baş İctimai Təhlükəsizlik İdarəsinin əməkdaşları dərhal hadisə yerinə gələrək münaqişə yaradanları ərazidən uzaqlaşdırdı və barələrində araşdırma aparılacaq”, - deyə Ağazadə öz Facebook səhifəsində yazıb.
