Binəqədi rayonunda, “Azadlıq” metrosunun yaxınlığında mopedləri oğurlayan dəstə üzvləri - Vüsal Nağıyev, Elgün Abbasov və yetkinlik yaşına çatmayan daha bir şəxs saxlanılıblar. Bu haqda bu gün, 9 fevral tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
DİN-dən verilən məlumata görə, dəstə başçısı Vüsal Nağıyev əvvəlcədən oğurluq məqsədilə qrup yaradaraq metronun yaxınlığında yerləşən kafelərdə işləyən kuryerlərin istifadəsində olan mopedləri gecə saatlarında oğurlayaraq müxtəlif şəxslərə satıb. Dəstənin əməlləri müşahidə kameraları ilə lentə alınıb.
Əməliyyat zamanı oğurluq mopedləri almaqda şübhəli bilinən Rəşad Nəsirov və Salman Abıyev də saxlanılıblar. Həmin şəxslərdən maddi sübut qismində oğurlanan mopedlər aşkar olunaraq götürülüb.
Qrup üzvlərinin Bakı şəhərinin digər ərazilərində də oğurluqlar törətmələri ehtimal olunur. Onlar barəsində 5-ci Polis Bölməsində toplanmış materiallar Binəqədi Rayon Polis İdarəsinin İstintaq Şöbəsinə göndərilib. Araşdırmalar davam etdirilir.
[caption id="attachment_90065" align="alignnone" width="640"]
Foto Daxili İşlər Nazirliyi[/caption]
