Oktyabrın 2-dən 6-dək Bakıdakı “Azərbaycan” kinoteatrında Mədəniyyət Nazirliyi və Kino Agentliyinin dəstəyi və Azərbaycan Animasiya Assosiasiyasının təşkilatçılığı ilə “ANİMAFİLM” VII Beynəlxalq Animasiya Festivalı keçiriləcək. Bu haqda bu gün, 2 avqust tarixində Bakuplus.az Azərtac.az-a istinadən məlumat verir.
Bu il festivala 2 beynəlxalq və 2 yerli kateqoriya üzrə 37 ölkədən 196 film daxil edilib. Seçim komissiyası bütün filmləri qiymətləndirib və 18 ölkədən 48 filmin müsabiqədə iştirakını məqbul hesab edib. Bunlardan 12 film yerli, 36 film isə beynəlxalq kateqoriyalar üzrə yarışacaq.
Demetrios Poursanidis (Yunanıstan), Niti Ramloqan (ABŞ), Nəzrin Ağamalıyeva, Elşən Cəbrayılzadə, Məsud Əlisoy, Vəfa Piriyeva (Azərbaycan) ilə təmsil olunan festivalın seçim komitəsi müsabiqə proqramına daxil edilmiş filmlərin siyahısını açıqlayıb.
Müsabiqəyə seçilən filmlər beynəlxalq münsiflər heyəti və tamaşaçılar tərəfindən qiymətləndiriləcək və qaliblər 7-ci “ANİMAFİLM” festivalının bağlanış mərasimində elan ediləcək. Münsiflər heyətinin üzvləri tezliklə açıqlanacaq.
Qaliblər üçün nəzərdə tutulmuş mükafatlar – Beynəlxalq müsabiqənin “Ən yaxşı qısametrajlı animasiya filmi – Grand Prıx”, “Uşaqlar üçün ən yaxşı qısametrajlı animasiya filmi”, Yerli müsabiqənin “Ən yaxşı Azərbaycan qısametrajlı animasiya filmi”, “Ən yaxşı Azərbaycan tələbə qısametrajlı animasiya filmi”, “Tamaşaçı rəğbəti” mükafatı və “Tərəfdaşların xüsusi mükafatları”.
Festivalın proqramı və bilet satışı sentyabr ayında açıqlanacaq.
