ARTIM Layihə Məkanında yeni sərgi keçiriləcək. Bu haqda BakuPlus.az bu gün, 21 aprel tarixində xəbər verir.
Aprelin 28-i, saa 19:00-da gənc rəssam Erkin Ələkbərlinin "Ad infinitum" adlı fərdi sərgisi təqdim olunacaq.
İki ay davam edəcək sərginin bütövlükdə ab-havası, eləcə də rəssamın kifayət qədər poetik yanaşması Çilinin tanınmış şairi Pablo Nerudanın şeirlərindən ilhamlandırıb. Nümayiş olunacaq əsərlər ümidsizlik təəssüratını bəxş etmir; əksinə, onları, yeni həyata başlamaq məqsədilə bir daha yaşanan, əzəli hisslərin müşahidəsi kimi də qələmə vermək olar.
Erkin Ələkbərli Azərbaycan Dövlət Rəssamlıq Akademiyasının "Rəngkarlıq" fakültəsini 2014-cü ildə bakalavr, 2016-cı ildə magistr üzrə bitirib. Gənc rəssam rəngkarlıq, qrafika, instalyasiya sahələrində işləyir.
Sərginin kuratoru Zəhra Məmmədovadır.
