6 may tarixində Bakıda, Müslüm Maqomayev adına Azərbaycan Dövlət Akademik Filarmoniyasında əməkdar incəsənət xadimi, professor, bəstəkar Oqtay Rəcəbovun 80 illik yubileyinə həsr olunmuş konsert keçiriləcək. Bu haqda bu gün, 3 may tarixində Bakuplus.az məlumat verir.
Proqramda dirijor Orxan Həşimovun rəhbərliyi ilə Üzeyir Hacıbəyli adına Azərbaycan Dövlət Simfonik Orkestri çıxış edəcək. Solist respublika və beynəlxalq müsabiqələr laureatı Mehin Əsədullayevadır.
Simfonik orkestrlə yanaşı, “Buta” instrumental ansamblının solistləri – Azərbaycanın xalq artisti Heydər Anatolu, Əməkdar artistlər Almaz Orucova, Gülüstan Əliyeva, respublika və beynəlxalq müsabiqələrin laureatları Rəvanə Qurbanova, Taleh Yahyayev, Rövşən Əziz, Aynur İsgəndərli, Vəfa Vəzirova və Zülfiyyə Məmmədova Rəcəbovun əsərlərini səsləndirəcəklər.
