“Film Bridge Azerbaijan” şirkəti Bakıda hindistanlı aktyor Ajut Kumarın rol aldığı “Vidaamuyarchi” (“Cəhd etmək”) filminin çəkilişlərini aparır. Bu haqda bu gün, 6 iyul tarixində Bakuplus.az Azərtac-a istinadən məlumat verir.
Filmin prodüseri Emin Quliyevin sözlərinə görə, çəkilişlər ötən ilin oktyabr ayında başlayıb. Filmin epizodları Xızı, Qobustan, Ələt, Şamaxı ərazilərində aparılıb.
“Layihəyə başlayanda seçimdə Birləşmiş Ərəb Əmirlikləri (Əbu-Dabi şəhəri), habelə Mərakeş və Azərbaycan var idi. Hər üç ölkəni gəzib Azərbaycanı seçdilər. Səhralığı Qobustanda və Xızıda lentə aldılar. Bədii filmin birinci hissəsində hadisələr bütünlüklə Azərbaycanı əks etdirir. Sonradan Gürcüstanda da çəkilişlər olmalı idi. Azərbaycana tam uyğunlaşdıqları üçün Gürcüstan səhnələrini də Azərbaycanda lentə aldılar. Filmi lentə alan şirkət Hindistanın cənubunda, Tamilnad ştatının Çennai şəhərində yerləşir”, – Quliyev deyib.
Filmdə Azərbaycan aktyorlarından Xalq artisti Vidadi Həsənov, həmçinin Cavanşir Hadıyev, Tural Əhməd, Vüsalə Ağayeva və Svetlana Bulax da rol alıblar.
“Vidaamuyarchi” filmi rejissor Magij Tirumeni tərəfindən lentə alınan döyüş filmidir. “Lyca Productions” və “Subaskaran Allirajah” tərəfindən istehsal olunur. Filmin Hindistan premyerası 2024-cü ilin oktyabrına nəzərdə tutulub.
[caption id="attachment_142925" align="alignnone" width="640"]
Foto Azərtac[/caption]
