Paytaxtda uşaq və yeniyetmələrin iştirak edə biləcəyi rəsm müsabiqəsi keçiriləcək. Bu haqda BakuPlus.az bu gün, 29 mart tarixində xəbər verir.
Müsabiqə “Azərbaycanım” V Respublika Uşaq Rəsm Festivalı çərçivəsində baş tutacaq müsabiqə eyni ad altında təşkil olunur.
Yaşı 21-ə qədər olan istedadlı şəxslər mayın 2-dək Xətai Sənət Mərkəzinin Facebook səhifəsinə təqdim etdiyi əsərin fotosu, əsərin adı, müəllifin adı, soyadı, təvəllüdü, təhsil aldığı məktəbi və əlaqə nömrəsini yerləşdirməklə müsabiqəyə qatıla bilər.
Sərbəst mövzulu olan əsərlər Facebook qrupunda tək-tək yerləşdirilməli, məlumatlar dolğun olmalı, 2-dən çox əsər göndərilməməlidir.
Müsabiqədə xarici ölkə vətəndaşları da iştirak edə bilərlər.
Seçim 3 yaş kateqoriyası üzrə aparılacaq və hər yaş kateqoriyasına ayrıca sərgi keçiriləcək: 11 yaşa qədər, 11-16 yaş arası və 16-21 yaş arası. Hər yaş qrupu üzrə ən yaxşı 10 əsərin müəllifi festivala dəvət olunacaq. Festival iştirakçıları diplom və hədiyyələrlə mükafatlandırılacaqlar.
Birinci turdan keçərək əsəri sərgidə nümayiş olunacaq şəxslər sertifikatla, fəal tədris mərkəzləri isə təşəkkürnamə ilə təltif olunacaqlar.
