Simfonik Orkestra yeni rəhbər təyin olunub. Bu haqda bu gün, 28 dekabr tarixində Bakuplus.az Report-a istinadən xəbər verir.
65 yaşlı Yalçın Adıgözəlov Heydər Əliyev Sarayının tabeliyində fəaliyyət göstərən Niyazi adına Dövlət Simfonik Orkestrinin bədii rəhbəri-baş dirijoru vəzifəsinə təyin olunub.
Y.Adıgözəlov Bakı şəhərində, Xalq artisti Vasif Adıgözəlovun ailəsində anadan olub. O, Azərbaycan Dövlət Konservatoriyasında piano ixtisası üzrə, N.A.Rimski-Korsakov adına Leninqrad Konservatoriyasında Opera və simfonik orkestr dirijorluğu ixtisası üzrə, eləcə də Vyana Musiqi Akademiyasında aspirantura təhsili alıb.
Yalçın Adıgözəlov Ü.Hacıbəyli adına Azərbaycan Dövlət Simfonik Orkestrinin və Azərbaycan Dövlət Akademik Opera və Balet Teatrının dirijoru olub. Həmçinin Ü.Hacıbəyli adına Bakı Musiqi Akademiyasında pedaqoji fəaliyyətlə məşğul olur. Dirijorluq kafedrasının professorudur.
O, “Əməkdar incəsənət xadimi” və “Xalq artisti” fəxri adlarına layiq görülüb, “Şöhrət” ordeni ilə təltif olunub.
