Bakıda 44 günlük Vətən müharibəsinə həsr olunmuş filmin premyerası olacaq. Bu haqda BakuPlus.az Azərtac-a istinadən bu gün, 29 aprel tarixində xəbər verir.
Aprelin 30-da Nizami Kino Mərkəzində İkinci Qarabağ müharibəsindəki şanlı Qələbəmiz münasibətilə ekranlaşdırılan “Köhnə çamadanlar” bədii filminin təqdimatı keçiriləcək.
Filmin ssenari müəllifi Sevda Sultanova, quruluşçu rejissoru Səidə Haqverdiyeva, görüntü rejissoru Şahmar Səfəroğlu, quruluşçu rəssamı Əfşan Əsədova, bəstəkarı Vüqar Camalzadə, montaj rejissoru Rza Almasi Pərqu, prodüserləri Kəmalə Nəhmətova və Nicat Məmmədov, art direktoru Tahir Tahiroviç, baş prodüseri Pərvinə İsmayılovadır.
Real hadisələr əsasında çəkilən tammetrajlı bədii filmdə Birinci və İkinci Qarabağ müharibələrində baş verən hadisələr kəsişir, hər iki dövrü əhatə edən ayrı-ayrı epizodlar vizual baxımdan bir-birini tamamlayaraq hekayənin vahid strukturunu yaradır.
Əsas rolları Xalq artistləri Məmməd Səfa, Pərvanə Qurbanova, Əməkdar artistlər Zemfira Əbdüsəmədova, Gülzar Qurbanova, Qızılgül Quliyeva, Şəfəq Əliyeva, Nəsibə Eldarova və başqaları ifa edirlər.
Film Əmək və Əhalinin Sosial Müdafiəsi Nazirliyi, “RS Prodakşn” və "OYUN" inklüziv teatrının birgə layihəsidir.
