Xalça muzeyində “Bir taleli iki insan” adlı sərgi açılacaq. Bu haqda 15 aprel tarixində Bakı Şəhər Mədəniyyət Baş İdarəsi məlumat verib.
Azərbaycan Milli Xalça Muzeyində aprelin 19-da Yelena və Ucal Haqverdiyevlərin yaradıcılığına həsr olunmuş “Bir taleli iki insan” sərgisinin açılış mərasimi keçiriləcək. Sərgidə iki rəssamın 54 ədəd rəngkarlıq və tətbiqi sənət əsəri nümayiş etdiriləcək. Yelena Haqverdiyevanın Səfəvi saray xalçalarını, ov və bağ səhnələrini xatırladan təsvirlər, mənzərələr, natürmortlar, sevgililərin obrazları ilə zəngin “Xalça bağları” əsərləri təqdim olunacaq.
Sərgidə tamaşaçılar rəngkarlıq və qrafika, monumental rəssamlıq, poeziya, həmçinin tətbiqi sənət üzrə çoxşaxəli yaradıcılığa malik Ucal Haqverdiyevin istedadının yeni aspektləri ilə tanış olacaqlar.
Mərasimdə 3 dildə hazırlanmış “Bir taleli iki insan” adlı kataloqun təqdimatı keçiriləcək. Sərgi iyunun 19-dək davam edəcək və sərgi çərçivəsində mühazirələr, ustad dərsləri təşkil ediləcək.
[URIS id=40808]
