Bakı şəhəri, Nəsimi rayonunda Azadlıq prospektinin Füzuli küçəsindən Dilərə Əliyeva küçəsinə qədər və Füzuli küçəsinin Azadlıq prospektindən Rəşid Behbudov küçəsinə kimi olan hissələrində daş örtüyü söküləcək. Bu haqda bu gün, 19 yanvar tarixində Bakupus.az Azərbaycan Avtomobil Yolları Dövlət Agentliyinin (AAYDA) mətbuat xidmətinə istinadən məlumat verir.
Sözügedən ərazidə yanvarın 21-i saat 10:00-dan etibarən daş örtüyünün sökülməsi və asfalt-beton örtüyünün çəkilməsi işləri aparılacaq. Təmir zamanı küçələrdə nəqliyyatın hərəkəti qismən məhdudlaşdırılacaq.
Sürücülərdən qeyd olunan müddətdə sözügedən ərazidə hərəkətdə olarkən diqqətli olmaları, yol hərəkəti qaydalarına əməl etmələri və nəqliyyat vasitələrini müəyyən edilmiş müvəqqəti yol nişanlarının tələblərinə uyğun idarə etmələri xahiş olunur.
