Bakıda Səngəçal terminalının elektrikləşdirilməsi üçün anlaşma bağlanıb. Bu haqda bu gün, 20 fevral tarixində Bakuplus.az “AzərEnerji”yə istinadən xəbər verir.
Bu gün “AzərEnerji” ASC və BP şirkəti (Səngəçal terminalının operatoru kimi) arasında Qarşılıqlı Anlaşma Memorandumu imzalanıb. Anlaşmaya əsasən, Səngəçal terminalının elektrikləşdirilməsini nəzərdə tutan bir layihə üçün texniki həll hazırlanacaq.
Bildirilir ki, “Səngəçal terminalının elektrikləşdirilməsi layihəsi” (STEL) üzrə ümumi iş həcminin müəyyənləşdirilməsi və bu həcmin “AzərEnerji” ilə Səngəçal terminalının operatoru arasında bölüşdürülməsi istiqamətində əməkdaşlıq nəzərdə tutulub. Tərəflər iş həcmini dəqiqləşdirmək üçün layihənin müfəssəl texniki dizaynı və kommersiya çərçivəsinin razılaşdırılması yönümündə də birgə işləyəcəklər.
Layihə həyata keçirildikdən sonra Səngəçal terminalının elektrik enerjisi təchizatı BP şirkəti tərəfindən Cəbrayıl rayonu ərazisində tikiləcək 240 MVt gücündə “Şəfəq” Günəş Elektrik Stansiyasında istehsal olunan elektrik enerjisinin Azərbaycan dövlət enerjisistemi ərazisinə ötürülməsi vasitəsilə təchiz olunacaq. Sözügedən stansiyada istehsal olunan enerji Səngəçal terminalının təchizatı üçün çatışmadıqda terminalın elektrik enerji təchizatı “AzərEnerji” ASC tərəfindən təmin olunacaq.
Enerjisistemdən verilən elektrik enerjisi daha az karbon sərfiyyatlı olduğu üçün terminaldakı neft-qaz əməliyyatlarından yaranan istixana qazı emissiyaları elektrikləşdirilmə nəticəsində azalacaq. Bu da Xəzər regionunda emissiyaların azaldılmasına və ölkənin "yaşıl enerji"yə keçidinə töhfə verəcək.
