Beş gün əvvəl Bakıda evdə meyitləri tapılan 4 nəfərin ölüm səbəbi hələ də məlum deyil. Hadisə ilə bağlı “Azəriqaz” İB-nin əməkdaşları araşdırma aparıblar. Bu haqda bu gün, 10 yanvar tarixində Bizim.Media məlumat verib.
Qurumun şöbə rəisi İlkin Behbudov bildirib ki, 4 nəfərin ölü tapıldığı mənzilin qaz sayğacı bloklu vəziyyətdə olub, yəni dəm qazından boğulma ehtimalı aşağı səviyyədədir: “Dekabrın sonundan sayğacda qaz limiti bitdiyinə görə bloklanıb. Mənzil daxilinə isə baxış keçirməyə müvafiq dövlət qurumları tərəfindən şərait yaradılmayıb. 4 nəfərin boğulması onu göstərir ki, bina evi olduğuna görə mənzilin daxilində hər hansı qaz cihazı da olmayıb. Təbii ki, yenə də araşdırma tələb edən bir məsələdir”.
Yanvarın 5-də Nərimanov rayonunda yerləşən mənzillərin birində 4 nəfərin meyiti aşkar olunub. Mənzilin sahibi polisə müraciət edərək bildirib ki, kirayəyə verdiyi mənzilin qapısı arxadan bağlıdır, kişi qapını nə qədər döysə də, kirayəçilər açmayıblar.
Hadisə yerinə gələn polis əməkdaşları qapını açıb və mənzildə 4 kişinin meyitini tapıblar. Cəsədlərin üzərində zorakılıq əlamətləri aşkar olunmayıb.
