AZAL Bakıdan İstanbula və əks-istiqamətdə olan uçuşlara Yeni il aksiyası təqdim edir. Bu haqda şirkətin mətbuat xidməti bu gün, 26 dekabr tarixində məlumat verib.
Aksiyaya uyğun olaraq, sərnişin iki aviabilet alarkən üçüncüsü aviaşirkət tərəfindən hədiyyə verilir.
Aksiya 26 dekabr 2022-ci il tarixindən 8 yanvar 2023-cü il tarixinədək həyata keçiriləcək J2-077/078 və J2-079/080 axşam reysləri üçün həm birtərəfli, həm də gediş-gəliş biletlərinə şamil edilir. Bilet satışı 7 yanvar 2023-cü il daxil olmaqla davam edəcək.
Kampaniya çərçivəsində aviabiletləri AZAL şirkətinin bütün akkreditə olunmuş agentliklərində və ya aviaşirkətin çağrı mərkəzinə callcenter@azal.az elektron poçt ünvanı vasitəsilə sorğu göndərməklə əldə etmək olar.
Aksiya çərçivəsində hədiyyə biletinin vergiləri və rüsumları ödənilir. Biletlərin yenidən təsis edilməsi və ya qaytarılması yalnız eyni vaxtda həyata keçirilə bilər.
