Azərbaycanın tanınmış aktyorları, Azərbaycan Milli Dram Teatrının xadimləri, Xalq artistləri Hacı İsmayılov, Əli Nur, Ramiz Məlik və Səidə Quliyeva, həmçinin Sumqayıt Dövlət Dram Teatrının aktyoru Valeh Kərimov Mədəniyyət Nazirliyi tərəfindən işdən çıxarılıblar. Bu haqda bu gün, 9 dekabr tarixində Bakuplus.az Report-a istinadən məlumat verir.
Nazirlikdən qeyd edilib ki, mövcud qanunvericilik 65 yaşına çatmış şəxslərin pensiyaya çıxmasını nəzərdə tutur.
Bildirilib ki, mədəniyyət, elm, təhsil kimi sahələrdə çalışanlar üçün istisnalar var: "Elmi və fəxri adları olan şəxslərlə müqavilələr 75 yaşına qədər uzadıla bilər. Bu, həmin şəxsin çalışdığı müəssisənin səlahiyyətində olan məsələdir. Mədəniyyət Nazirliyi olaraq belə məsələlərə olduqca həssas yanaşırıq. Lakin qanunvericilikdə göstərilir ki, bir müəssisədə yaşı 65-i ötən əməkdaşların sayı orada çalışan əməkdaşların sayının 2 faizini təşkil etməlidir".
Nazirlik əksər teatrlarda hələ də yaşlı sənətkarların çalışdığını vurğulayıb: "İstənilən teatrın səhnəsində belə qocaman sənətkarlarımızın ifasında müxtəlif tamaşalara baxmaq mümkündür. Ancaq bir gerçəkliyi də unutmaq olmaz ki, Azərbaycan Dövlət Mədəniyyət və İncəsənət Universitetini hər il onlarla tələbə aktyor, rejissor, teatrşünas bitirir. Ölkədə isə cəmi 25 dövlət teatrı fəaliyyət göstərir. Bu məzunların teatrlarda işlə təmin olunması ciddi problemə çevrilir. Məlum olduğu kimi, teatr elə bir sənət növüdür ki, daim yeni nəfəsə, yeni istedadlara ehtiyac duyur. Teatrların ştatları isə məhdud saydadır və stabildir".
